Arquivo da categoría: As lecturas do Sr B

As lecturas do Sr B: Hernán Esteve

Aquí en español

O labirinto da propia vida e o alter ego como terapia.

Esta nova obra de Hernández, vello coñecido da escena fancineira hispana, está editada pola granadina Libros de Autoengaño e ten un declarado ton autobiográfico. Nun exercicio de desdobramento e de sinceridade brutal o autor ispe o corpo e a alma, e a través dun alter ego, Hernán, e do seu propio personaxe vai debullando cousas da súa vida nas que calquera pode recoñecer a súa infancia, a súa xuventude ou a súa madurez, ou todas a un tempo, porque o libro ten algo de xeracional.

O amor e a amizade, ou a confusión de ambos, que só se pode diferenciar coa distancia da madurez, a manipulación dun adolescente, a inocencia, e porén, a súa perda, estes son algúns dos momentos vividos que Esteban deita nesta obra, un libro que se antolla valente polo que ten de exhibicionista, de berrar certa normalidade oculta e de poñer en cuestión o transcorrer da propia vida. Un exercicio de auto psicoanálise que pode chegar a ser tan imprescindíbel como suicida ou tan innecesario como salvador.

O estilo de Hernández vai cara a caricatura-realista ou máis ben a realidade caricaturizada, nun recurso gráfico que tamén (e tan ben) manexa o italiano Zerocalcare, a hipérbole gráfica a xeito de transposición do recurso que tan bo resultado lle deu a Woody Allen, levar a súa propia imaxe e personalidade ao hiperbólico como xeito de establecer unha separación do real coa realidade, algo que autores con habilidade para o humor e a esaxeración son quen de converter nun excelente vehículo de transmisión de sentimentos.

O libro está feito cun bitón azul que non só agradábel senón que ten unha certa función narrativa, a cor ou a súa ausencia subliñan momentos, agradécese este estilo que alixeira visualmente a carga metafórica e de cotidaniedade delirante, e por tanto, real que ten o guión. Tal vez o único aspecto mellorábel está precisamente nesta parte, no guión, que peca dun exceso de intención metafísica que non acada, o ritmo narrativo está lastrado pola total ausencia de palabras da primeira parte, sen dúbida unha aposta forte, radical, pero que non deixa de ser un alarde que lle senta mal ás pretensións filosófico-narrativas do autor.

As lecturas do Sr B: Insecto

Aquí en español.

Amor disléxico.

Vivimos nunha sociedade hipersexualizada, mais iso si, sempre dentro duns cánones, a moral e a tradición nacional-católica aínda teñen demasiado peso neste estado que é cada vez máis carpetovetónico douspuntocero. Insecto é un fermoso libro de temática erótica de María Llovet, debuxante Barcelonesa cun dinámico estilo manga, que aborda as relacións diferentes.

Insecto conta a historia de Lea e Lucas, dous irmáns adolescentes, ela, rebelde que goza coa provocación, en loita constante coa nai, e el, calado e disléxico, os dous viven unha relación carrusel, de sentimentos incontrolábeis, que os levan a un “amor fou” que causará escándalo en mentes vetustas de visón e misa de doce e fruición nas máis abertas, aventureiras e soñadoras. Sigue lendo

As lecturas do Sr B: Escapar. Historia de un rehén

Aquí en español.

Ser refén é peor que estar na cadea

Guy Delisle é un deses autores que foi quen de saltar a barreira do cómic e chegar a lectores non habituais do medio, de feito é un deses que coñecen os plumillas culturetas que só escriben de BD tres veces no ano.

E isto quizais porque consideran que o feito de que autores como Delisle ou Joe Sacco mestures a BD co xornalismo implica un estamento que dignifica todo o que toca (salvando os seus propios traballos).

Mais tamén pode que sexa polo xeito que ten Delisle de contar as historias, a medio camiño entre o relato xornalístico e a comedia de Berlanga que el sabe mesturar nas proporcións precisas en cada un dos seus libros. Tamén, talvez, porque embaixo da capa de sarcasmo e trazo sinxelo e caricaturesco hai un sólido narrador dispara con certeira seta. Sigue lendo

As lecturas do Sr B: Futbolín

Aquí en español.

Tralla brava!

Moitas veces lle teño escoitado a Xurxo Souto: Somos un pobo creador! Unha frase fermosa para definírmonos, porén non deixa de ser paradoxal o feito de que unha novela que é a un tempo bio e gráfica (desculpen a brincadeira) titulada futbolín e dedicada a contar a vida de Alexandre de Fisterra (Alexandre Campos Ramírez), o inventor do matraquiño, sexa obra dun italiano. Bo, tamén podemos tómalo como unha mostra do internacionalismo do que sempre fixemos gala… emigrando.

A historia deste libro céntrase en Alexandre, un rapaz inquedo e creativo que vive o comezo da guerra civil en Madrid, onde coñece a a grandes intelectuais coma León Felipe ou Neruda. Ferido nun bombardeo, pasa a convalecencia en Barcelona, precisamente alí, é onde inventa o futbolín, para poder xogar cos seus compañeiros feridos. A partir de aí a vida de Alexandre é un continuo exercicio de supervivencia e de exilio, pasa primeiro a Francia e logo a Sudamérica onde vivirá décadas. Sigue lendo

As lecturas do Sr B: El olor de los muchachos voraces

Aquí en español.

O western coma o mecanismo dun reloxo suizo

Frederik Peeters é un dos grandes nomes da banda deseñada europea, o seu nome vai de xeito indefectíbel xunto ao “Pílulas azuis”, o libro que o fixo coñecido e no que con grande sensibilidade contaba como é convivir con alguén que é portador do virus da SIDA, e como afecta isto a unha familia, que amais, é a súa.

Comezou co pílulas unha carreira que non fai máis que medrar en calidade a medida que medra a súa produción, Peeters vaise superando con cada libro e variando de rexistro como poucos se atreven, da obra social á ciencia ficción ou desta ao policíaco, e agora, ao western. Sigue lendo

As lecturas do Sr B: Os Vampiros

Aquí en español.

Eles comen tudo e nâo deixam nada.

Foto: www.laxantecultural.com

Despois de publicar catro entregas dunha das obras máis exitosas da banda desenhada portuguesa, Dog Mendonça e Pizzaboy, (absolutamente recomendábel) o guionista Filipe Melo e o debuxante Juan Cavia volven con esta excelente “Os vampiros”, unha novela gráfica de máis de duascentas páxinas cun evidente salto cara adiante nas aptitudes narrativas de ambos. Esta historia viaxa por territorios que sempre son difíciles; pola temática, a guerra de liberación colonial da Guiné-Bissau e pola dimensión certamente psicolóxica que sobrevoa o relato. Sigue lendo

As lecturas do Sr B: Permanezcan en sus asientos

Aquí en español.

A trasnada xenial de Jano.

O coruñés edita coa imprescindíbel e xeitosa editora viguesa Fosfatina este cómic de exquisita factura, que xa avisa cunha portada de elegantes cores e de atractiva finura compositiva. Segue a actual moda das tintas metalizadas, neste caso prateado, que combinado co marrón e o negro e un papel de atractiva textura fan que o efecto chamada da capa sexa irresistíbel.

Jano desenvolve neste libro tres sorprendentes e fantásticas (por non dicir psicotrópicas) historias curtas que conflúen nas páxinas finais. Tres historias con certo nimbo misterioso que deixan espazo para a propia elucubración e que sen dúbida darán algunha volta polas nosas cabeciñas buscando as solucións aos misterios que nos propón o autor.

Co seu peculiar estilo e un ritmo case que fixo de catro cadriños por páxina, interrompido as veces por marabillosas ilustracións a páxina completa, este libro é unha obra valente, audaz e estilísticamente fermosa. Jano acentúa a súa visión do cómic da que xa foi avisando con magníficas obras coma Operario ou Nacho Camacho.

Jano deixa as veces a soidade do corredor de medio fondo, só un intre para mirar arredor e deixarnos un libro que é pura elegancia “mod” remesturando historias que ben poderian ser dunha peli da Hammer. O trazo sinxelo e liñas rectas, un manexo espectacular das sombras e das masas de negro fan de Jano un autor cun discurso creativo propio alonxado das modas da BD actual e porén, cunha carreira que decorre alonxada do “mainstream” que fai deste constructivista das viñetas un dos máis interesantes autores galegos.

Este libro de 48 páxinas en branco e negro conta tanto nos silencios coma nos textos, é sinxelo mais só aparentemente, é lixeiro, o que permite lelo axiña, porén o cerebro pedirache volver, reler, admirar, parar na excelencia gráfica. Sen dúbida é un libro para padais exquisitos, unha delicatessen na que Jano sublima a súa mestría gráfica e narrativa, que Fosfatina fai realidade cun gusto e unha calidade moi bos.

Esta recensión foi publicada en novembro de 2016 na revista Tempos.